Takk fyrir skemmtunina!

Við sem störfum fyrir starfsmannafélagið viljum þakka öllum þeim sem komu á Grímuballið þarsíðustu helgi kærlega fyrir framúrskarandi kvöld. Mikið ofboðslega var gaman og þvílíka stemningu og dansfimi höfðu margir viðstaddra ekki séð í langan tíma. Hljómsveitin Geirfuglar biðja fyrir kærri kveðju til allra og hrósuðu ballgestum í hásterrt fyrir góðan anda og fyrir að stíga dans allt frá fyrstu tónum.

( Á myndinni er Halldór Gylfason söngvari Geirfugla í William Shakespeare búningi að kenna gestum línudans. Til vinstri má sjá Dalmatíu-dívurnar úr Kringlunni)



Allt fór þetta vel fram og gestir voru hinir glæsilegustu. Kenna mátti ýmissa grasa: þarna voru blóm og býflugur, rauðhetta, bangsar og kanínur, annar kúrekinn í Brokeback mountain, Zorro, Bessastaðahjónin og margt fleira. Verðlaun voru veitt í nokkrum flokkum; fyrir besta búninginn hlaut Herdís í birgðabókhaldi verðlaun, verðlaun fyrir frumleika hlaut Erna símadíva og par kvöldsins var kosið Inga Rún og Haffi úr versluninni í Hallarmúla.

(Á myndinni má greina Herdísi Þorgeirsdóttur í vægast sagt vafasömu gervi)








Að öllum öðrum ólöstuðum sem mættu þá er vert að nefna starfsfólk Pennans í Kringlunni sem mættu öll í þrumustuði og voru öll í samskonar búningum. Sérdeilis húrrandi skemmtileg. Fyrir frábæra þátttöku og sýnda samstöðu hljóta þau sérstök aukaverðlaun í formi glaðnings sem sendur verður til þeirra í vikunni!
Myndasyrpa frá kvöldinu er svo væntanleg síðar!

(Hér til hliðar gefur að líta forsetahjónin en þau ávörpuðu samkomuna og dönsuðu svo frameftir nóttu...reyndar eru þetta Kristján Freyr ásamt konu sinni Bryndísi)

Með því að klikka á myndirnar er hægt að skoða þær í stækkaðri mynd.

Verndari ballsins!

Kæru starfsmenn Pennans,
mér er það mikill heiður að halda verndarhendi yfir skralli ykkar í kvöld og vona að þið gangið hægt um gleðinnar dyr. Allt frá því að ég var lítill strákur á Ísafirði hef ég haft lúmskt gaman af því að klæða mig upp í búninga og hver kannast ekki við það að hafa laumast í fataskáp móður sinnar svo ég tali ekki um snyrtivörurnar. Þið starfsfólk Pennans hafið verið mér ansi kært í gegnum tíðina og eins og ég hef sagt með okkur íslendinga, sem erum herlaus þjóð, þá höfum við það að leiðarljósi "að penninn er máttugri en sverðið". Þess vegna mætti segja að þið annist varnir landsins.

Engu að síður vænti ég þess að þið gleðjist saman og njótið samvista með félögum ykkar sem þið hittið jafnvel einungis á vinnutíma.
Við Dorrit komumst því miður ekki í kvöld en biðjum kærlega að heilsa...!
Hr. Ólafur Ragnar Grímsson

Föstudagsfjörið, áfram með smjörið!

Nú er allt á suðupunkti. Það er mjög góður fjöldi fólks sem ætlar að mæta og heyrst hefur að metingur sé orðinn mikill meðal fólks. Þannig heyrðist af þeim Kjartani og Ingþóri rífast á skrifstofu Pennans um hver hefði fjárfest í dýrari og flottari búningi. Það mun koma í ljós í kvöld. Þeir leggja línuna fyrir sínar deildir og skora á allt sitt fólk á vörusviði og verslanasviði að mæta í stuði niðrí Laugardal.
Mikið kapp hefur færst í starfsfólk verslananna um mætingu. Nú er staðan þannig að Penninn Kringlunni er algjörlega að mala þetta. Starfsfólk Pennans KR verða með yfir 100% mætingu!! Allir mæta og síðan bætast makar í hópinn. Ef við þekkjum starfsfólk annarra verslana rétt þá mun þessi frétt virka sem olía á eldinn.
Við hvetjum alla starfsmenn að taka með sér vini og vandamenn. Húsið opnar kl. 21.00. Fjöldi vinninga verður gefinn fyrir bestu og frumlegustu búningana. Hljómsveitin hefur óskað eftir að fá að taka þátt í búningakeppninni. Gangi þeim vel að finna Geirfuglabúninga, þeir búningar eru löngu útdauðir.

Við látum svo fylgja með mynd af leynigesti kvöldsins, þarna var hann að máta búninga í vikunni og orðinn mjög spenntur...eins og sést glögglega!

Skráningin hefur aukist dag frá degi...!

Nú fara línur að skýrast, fólk er að taka við sér og skrá sig á ballið! Allir eru að átta sig á hversu gaman þetta verður. Það eru engar kvaðir með búninga eða slíkt, látið ekki búningavöntun stoppa ykkur og svo er sjálfsagt að bjóða vinum sínum með, það kostar 1.000 kr,- fyrir aðra en starfsmannafélagsmeðlimi.
Við höfum öll gott af því að verðlauna okkur sjálf fyrir góða skólavertíð, hittast og skemmta okkur ærlega á þessu skemmtilega skralli!
Borgar Jónsteinsson rekstrarstjóri verslunarsviðs er eins og er í sumarfríi og kemst ekki á ballið, sem er mjög leiðinlegt. En Borgar má eiga það að hafa verið sniðugur og keypt búning. Hann vildi nefnilega ekki missa af búningaverðlaununum og sendi inn þessa mynd. Borgar minn, við skulum taka hana með í keppnina en við lofum engum árangri!

Geirfuglarnir skemmta á ballinu!

Það er hér með gert opinbert að hljómsveitin Geirfuglarnir munu spila á grímuballinu á föstudaginn. Geirfuglarnir eru mjög vinsælir í samkvæmum sem þessum og spila allt milli himins og jarðar, t.a.m. kunna þeir Kokkinn, stefið úr Derrick þáttunum og líka lög með AC/DC.
Geirfuglana skipa; Halldór Gylfason söngvari og rauðhærður leikari með krullur, Freyr Eyjólfsson mandólínleikari og dagskrárgerðarmaður á Rás 2, Stefán Már Magnússon bassaleikari og sonur Magga Eiríks, Þorkell Heiðarsson harmonikkuleikari og líffræðingur, Ragnar Helgi Ólafsson gítarleikari og einn helsti bókakápugerðarsnillingur Íslands og loks Andri Geir Árnason trommari og símsmiður.

Taktu þátt í skemmtilegum leik!

Bryndís Loftsdóttir vörustjóri íslenskra bóka er þarna í heimsókn í einni af okkar verslunum.

Í hvaða verslun er Bryndís stödd og hver er verslunarstjóri þeirrar verslunar?

Svaraðu þessari spurningu rétt hér fyrir neðan í "comments", mundu að skrá nafnið þitt og starfsstöð. Sá eða sú sem svarar rétt fyrst vinnur sér inn 2 miða á "Grímuball aldarinnar"!

Ekki amalegt það!

Nú er að hafa hraðann á, hver verður fyrstur til að svara rétt?!